Berdin Blai Gela, 2025ean abian jarriko den doako eta onlineko espazio berria, beren zentroek antolatutako jardueretan berdintasun arloko ezagutzak ugaritzeko eta genero-ikuspegia txertatzeko interesa dutenen Euskal Etxeetako kide guztientzat diseinatuta dago. Ikuspegi malguarekin, parte-hartzaile bakoitzak ordutegiak eta dedikazio maila aukeratu ahal izango ditu, eta prestakuntza-saioetara bakoitzaren erritmoan sartzeko aukera izango dute. Eredu horren bidez, ordutegiekin edo egunekin bat etorri ezin zutelako orain arte aurreko prestakuntzetan parte hartu ezin izan duten pertsonek ikasteko aukera izatea erraztu nahi da.
Gainera, Berdin Blai Gela sentsibilizazio-gune bihurtuko da, berdintasunari eta generoari buruzko beste baliabide interesgarri batzuetarako loturak eskaintzen baititu.
2021ean abian jarri zenetik, Euskal Etxeetako 120 lagun inguruk parte hartu dute prestakuntza-saio horietan beren zentroetan antolatutako jardueretan generoaren ikuspegia nola txerta dezaketen jakiteko. Euskal Etxe horiek herrialde hauetan daude, besteak beste: Argentinan, Txilen, Perun, Kolonbian, Venezuelan, Uruguain, Brasilen, AEBn eta Europan. 2025era begira, helburua da gai horretan prestakuntza jasotzeko interesa duten Euskal Etxeen sarea zabaltzea eta lantzen diren gaiak are gehiago dibertsifikatzea.
Berdin Blai Gela hurrengo hilabeteotan jarriko da martxan, hiru prestakuntza-proposamen berrirekin. Aurki ezagutaraziko da egutegia. Hauek izango dira proposamen horiek:
- “SEXUA-GENEROA SISTEMA: OINARRIZKO KONTZEPTUAK” (MAILAREN ARABERA KOKATZEA) – Iraupena: 2 aste
- “BERDINTASUNA, EUSKAL ETXEEN KUDEAKETAREN KALITATEZKO ELEMENTUA” – Iraupena: 4 aste
- “INDARKERIA MATXISTAREN PREBENTZIOA EUSKAL ETXEEN BIDEZ: PREBENTZIO ETA JARDUKETA PROTOKOLOEN GARRANTZIA” IKASTAROA – Iraupena: 4 aste
Aurreko urteetan antolatutako prestakuntzen aurreko edizioak kontsultatu nahi dituztenentzat, informazio osoa eskuragarri dago web-atariko FORMAKUNTZA atalean.